إحنا مين
عين مزاد تطبيق إعلانات مبوبة من «عين (Ain Vision)» في مصر، بيوصّل البايع بالمشتري. إحنا مش طرف في البيع، ومابنستلمش فلوس بين الناس. التفاصيل في شروط الاستخدام.
البيانات اللي بناخدها
- رقم الموبايل: اللي بتكتبه عشان المشترين يكلموك، وبنتأكد منه برسالة واتساب إنت اللي بتبعتها لما الخدمة دي تبقى متاحة. رقم البائع بيظهر بس للي داخل بحسابه ورقمه متأكد، لما يدوس «واتساب» أو «اتصال».
- حساب جوجل أو ابل: لو دخلت بيهم بناخد بريدك ومعرّف الحساب بس عشان نعرفك المرة الجاية، وبنطلب تأكيد رقمك بالواتساب قبل أول إعلان. مابنعرضش بريدك لحد، ومابناخدش أي صلاحية تانية على حسابك.
- الاسم والمحافظة: اللي بتكتبهم، وبيظهروا مع إعلاناتك.
- الإعلانات والصور: بنضغط الصور على موبايلك ونمسح منها أي بيانات زي الموقع قبل الرفع.
- طلب «أول ١٠٠ تاجر»: اسم المحل ومكانه ونوعه، وصورة واجهة المحل، ورقم السجل التجاري لو كتبته. الصورة والطلب بيشوفهم فريق عين مزاد بس، ومابيظهروش في أي صفحة عامة. رقم السجل بيتمسح بعد المراجعة ويفضل منه بصمة بس عشان مايتكررش. الطلب المرفوض بيتمسح هو وصورته بعد ٣٠ يوم، والمستني بعد ٩٠ يوم من غير مراجعة، والمقبول لما الحساب يتمسح أو بعد ٣٠ يوم من شيل صفة التاجر. وبيفضل سجل صغير بالقرار وتاريخه لمدة سنة من غير صور ولا بيانات المحل.
- أرقام التاجر: بنعد مرات فتح إعلانات التاجر (كل جهاز مرة في اليوم) وعدد اللي طلبوا رقمه (كل شخص مرة)، ومابنوريش التاجر أي اسم أو رقم للمهتمين.
- البلاغات: لو بلّغت عن إعلان، البائع مش بيعرف إنت مين.
- المحفوظ والمحظورين: متخزنين على موبايلك بس.
- إحصائيات مجهولة: بنعد مرات مشاهدة كل إعلان، وعدد الأجهزة اللي فتحت التطبيق في اليوم بمعرّف عشوائي مش مربوط بيك، عشان نعرف أكتر الأقسام اللي الناس بتدور فيها.
مابنبيعش بياناتك لحد، ومفيش إعلانات بتتبعك. بنستخدم خدمات جوجل (قاعدة البيانات وفحص الإعلانات من النصب بالذكاء الاصطناعي) وكلاودفلير (تخزين الصور والسيرفر).
قواعد النشر
- ممنوع أي حاجة مخالفة للقانون: سلاح، مخدرات، أدوية من غير روشتة، حيوانات محمية، أو محتوى مسيء.
- ممنوع طلب عربون أو تحويل فلوس قبل المعاينة، أو طلب أكواد.
- الإعلان لازم يبقى حقيقي، بصور الحاجة نفسها وسعرها الحقيقي.
- كل إعلان بيتفحص قبل ما ينزل (الصور والكلام)، و٣ بلاغات بتخفي الإعلان لحد ما يتراجع. المخالف حسابه بيتوقف.
- الإعلان بيفضل ٣٠ يوم، وبعدها بيخلص وصوره بتتمسح بعد ٣٠ يوم كمان.
الخدمات المدفوعة
النشر ببلاش. «رفع لفوق» و«مميز ٧ أيام» و«باقة بيع سريع» خدمات اختيارية بالدفع من جوجل بلاي أو ابل. لو الإعلان اترفض بعد الدفع، فلوسك بترجع.
حقوقك على بياناتك
- تشوفها أو تاخد نسخة منها: ابعتلنا من نفس الرقم أو البريد اللي داخل بيه، وبنبعتلك البيانات اللي عندنا عنك في خلال ١٤ يوم.
- تصلّحها: الاسم والمحافظة من «حسابي»، وأي حاجة تانية ابعتلنا.
- تمسحها: من مسح الحساب تحت.
- تسحب موافقتك: على الإشعارات من إعدادات موبايلك، وعلى أي تواصل تسويقي مننا (لو حصل) بكلمة «وقّف».
بتفضل قد إيه: بيانات الحساب (الاسم والرقم والبريد والمحافظة) لحد ما تمسح الحساب. الإعلان ٣٠ يوم، وصوره ٣٠ يوم بعدها. المزايدات بتتمسح بعد ٦٠ يوم. والبلاغات بتتمسح بعد سنة، وبتفضل لحد كده عشان الحماية من النصب، والبلاغات اللي إنت عملتها بتفضل من غير اسمك ولا رقمك بعد ما تمسح حسابك. وطلبات التجار مدتها مكتوبة فوق.
مين بيشوف بياناتك: فريق عين مزاد (المراجعة والبلاغات)، والخدمات اللي بنشغّل بيها التطبيق: جوجل (قاعدة البيانات والإشعارات وفحص الإعلانات بالذكاء الاصطناعي)، وكلاودفلير (السيرفر والصور)، وواتساب من ميتا (رسالة تأكيد الرقم اللي إنت بتبعتها). الخدمات دي سيرفراتها ممكن تبقى بره مصر. ومابنسلّمش بياناتك لجهة رسمية غير بطلب رسمي.
مسح حسابك في عين مزاد
من التطبيق: حسابي ← الحساب والخصوصية ← مسح الحساب نهائيًا. بنمسح اسمك ورقمك وبريدك وكل إعلاناتك وصورها على طول.
ولو مش قادر تفتح التطبيق، ابعتلنا من نفس البريد أو الرقم اللي داخل بيه على العنوان اللي تحت، ونمسح الحساب خلال ٧ أيام. البلاغات اللي إنت عملتها على إعلانات غيرك بتفضل من غير اسمك ولا رقمك، عشان الحماية من النصب.
كلّمنا
البريد: ouf5000@gmail.com
آخر تحديث: ١٨ نوفمبر ٢٠٢٦ · شروط الاستخدام وقواعد المزاد